‘டைரி’ படத்தின் மூலம் இயக்குநராக அறிமுகமான இன்னாசி பாண்டியன், தனது அடுத்த கட்ட திரைப்பயணமாக ‘Western Ghats Pictures LLP’ என்ற சொந்த தயாரிப்பு நிறுவனத்தை தொடங்கியுள்ளார்.
அருள்நிதி நடிப்பில் வெளியான ‘டைரி’ திரைப்படம் ரசிகர்களிடையே நல்ல வரவேற்பைப் பெற்றதுடன், நான்கு ஆண்டுகளுக்குப் பிறகும் சமூக வலைதளங்களில் தொடர்ந்து பேசப்பட்டு வருகிறது. இதற்கு ரசிகர்கள் அளித்து வரும் அன்புக்கும் ஆதரவுக்கும் இன்னாசி பாண்டியன் நன்றி தெரிவித்துள்ளார்.
இந்நிலையில், ராகவா லாரன்ஸ் மற்றும் எல்வின் நடிப்பில் உருவாகியுள்ள அவரது இரண்டாவது திரைப்படமான ‘புல்லட்’ படத்தின் பணிகள் நிறைவடைந்துள்ளன. விரைவில் படம் வெளியாகும் என எதிர்பார்க்கப்படுகிறது.
மேற்கு தொடர்ச்சி மலைகளுடன் தனது வாழ்க்கைக்கும் வேர்களுக்கும் உள்ள தொடர்பை பிரதிபலிக்கும் வகையில் ‘Western Ghats Pictures’ என்ற பெயரை தனது தயாரிப்பு நிறுவனத்திற்கு சூட்டியுள்ளதாக இன்னாசி பாண்டியன் தெரிவித்துள்ளார்.
இந்த புதிய நிறுவனத்தின் மூலம் தனது முதல் தயாரிப்பை விரைவில் ரசிகர்கள் முன் கொண்டு வருவதில் மிகுந்த உற்சாகத்துடன் இருப்பதாகவும் அவர் தெரிவித்துள்ளார்.