சிவகார்த்திகேயன் மேடையில் பேசியபோது, “மடோன் எடுத்த படம் அனைத்தும் கடுமையான கதைகள். ஆனால் அதை ஜனரஞ்சகமாக மக்களிடம் எப்படி கொண்டு செல்ல வேண்டும் என தெரிந்து கொண்டு பணியாற்றி உள்ளார். படப்பிடிப்பில் ஒரு நாள் கூட அவர் யாரையும் திட்டியது இல்லை. ஆனால், அனைவரையும் வேலை வாங்குவதில் நல்ல திறமையாளர். நான் இயல்பாக நடிப்பதை போல் இந்த படம் இருக்காது, வேறு பாதையில் நடித்து உள்ளேன். இந்த படம் ஒரு பேண்டசி படம். தயாரிப்பாளர் பணம் அளிப்பவர் மட்டுமில்லாமல் ஒரு இயக்குநரின் மனதில் இருக்கும் கதையை எப்படி மக்களிடம் கொண்டு செல்ல வேண்டும் என யோசிப்பவரும்தான்” என்று தெரிவித்தார்.
இதனைத் தொடர்ந்து, திரையரங்குகளில் சினிமா டிக்கெட்டின் விலை உயர்வு கோரிக்கை தொடர்பாக செய்தியாளர்கள் எழுப்பிய கேள்விக்கு பதிலளித்த அவர், “திரையரங்குகளின் உரிமையாளர்கள் கோரிக்கை வைத்துள்ளனர்; அதற்கு அரசுதான் நடவடிக்கை எடுக்க வேண்டும். ஒரு நடிகனாய் என்னுடைய படம் மக்களிடம் சரியாக செல்கிறதா, அவர்களுக்கு பிடித்தது போல் இருக்கின்றதா என்பதை பார்ப்பது மட்டும்தான் எனக்கானது. படங்கள் இயக்குவது என்பது மிக மிகக் கடுமையான பணி; எனக்கு படங்கள் இயக்குவதற்கு எப்போது தன்னம்பிக்கை வருகிறதோ, அப்போது இயக்கத் தொடங்குவேன்” எனக் கூறினார்.
